O Albergue Municipal San Roque está situado no campo que leva o mesmo nome. Saíndo deste albergue e camiñando pola estrada á dereita chegamos á AC-445. Debemos cruzala con moito coidado, xa que non hai paso de peóns, para continuar de fronte polo lugar de O Vilar. Este camiño é parte da prolongación do Camiño de Santiago ata Fisterra, pero imos percorrelo en sentido contrario. Rapidamente chegamos ao lugar de O Vilar, onde tamén hai gran cantidade e hórreos e varias mostras interesantes de arquitectura popular.

Desde alí ata a vila de Corcubión hai algo menos de 1 km, que se percorre en permanente baixada. Se continuamos seguindo o Camiño de Santiago (en sentido contrario), á esquerda, unha vez que pasamos as casas situadas neste traxecto, debemos tomar a pista que baixa á dereita na bifurcación. Así camiñaremos uns minutos por unha ampla pista de terra polo monte de Corcubión, gozando dunhas fermosas vistas da ría. Ao final desta pista de terra chegamos ao núcleo de Corcubión. Seguido pola esquerda alcanzaremos a Capela de San Antonio, situada no campo que leva o seu mesmo nome e onde podemos observar tamén un cruceiro.

A continuación baixamos á dereita por unha rúa estreita e empinada (a Rúa Perigos) que baixa cara o sur e o centro da vila. Merece a pena pola súa singularidade e por algunha das casas que hai nela, como o é o Antigo Pósito Marítimo.

Baixando ata o final desta rúa desembocamos na Rúa Rafael Juan e continuamos ata a Rúa Antonio Porrúa. Ambas formaban parte da vella Rúa Real, que antigamente cruzaba toda a vila, onde atopamos bos exemplos de vivendas tradicionais corcubionesas e casas brasonadas como son a Casa Castreje ou o Pazo dos Dios e Pose, así como a Capela do Pilar.

Se continuamos avanzando chegamos á Praza de Castelao, na que podemos observar a “Casa do Pirata” ou a Casa Miñones, outra das edificacións singulares desta vila mariñeira. En fronte atopamos unha das fontes públicas que aínda existen en Corcubión: a fonte dos catro canos. Á dereita do palmeiral nacen varias rúas moi pequenas que chegan ata a Casa do Concello, o Edificio José Carrera. Desde a praza do concello (Praza José Carrera), podemos coñecer a parte “traseira” de Corcubión, moi rica en recunchos, cando menos, particulares. Recomendamos ao visitante que se perda un pouco por esta zona, tendo sempre como referencia a Praza de Castelao.

Regresamos, de novo, á Praza de Castelao. Aínda queda gran parte do núcleo urbano de Corcubión por visitar. Mirando ao sur hai tres rúas que parten da praza. A máis próxima ao mar é a Rúa San Marcos. Nela atopamos, á esquerda, o Pazo dos Condes de Altamira, propiedade e morada dos antigos señores de Corcubión e desde onde se administraba a xurisdición sobre máis de vinte parroquias. Esta xurisdición era una mestura do xulgado e do que é actualmente o concello, con atribución na recadación de impostos e nas levas de soldados. Se avanzamos por esta rúa podemos admirar outras casas relevantes ata chegar á Praza Párroco Francisco Sánchez, onde se encontra a Igrexa de San Marcos. Ademais da igrexa, podemos admirar unha das prazas máis fermosas da vila e un exemplo de Casa do Patín como o é o Pazo dos Lamas.
Continuamos pola rúa que sobe, a Rúa das Mercedes. No medio dela, diante dunha praciña pequena cun cruceiro, pódese admirar unha das casas brasonadas que ten Corcubión: a Casa dos Obregón (coñecida tamén como Casa Teixeira).

De seguido chegamos ao Campo do Rollo, praza recollida onde se atopa o parque infantil. Volvemos recomendar aos visitantes que se perdan un pouco polas rúas desta parte de Corcubión e descubran os recunchos singulares que se poden atopar.

Desde o Campo do Rollo, continuando un pouco cara o sur, está situado o antigo (Pazo de Antonio de Leira e Castro, unha importante figura que destacou por ser vicecónsul de Inglaterra en Corcubión, alcalde desta vila e factor durante a guerra contra os franceses, ademais de concederlle patente de corso o rei Carlos IV en 1800.

Desde aquí volvemos sobre os nosos pasos ao Campo do Rollo e descendemos en dirección norte. A primeira casa á esquerda é o edificio do Antigo Xulgado do Partido. Situándonos diante da fachada do Antigo Xulgado (mirando cara a Praza de Castelao), continuamos á esquerda ata chegar á Praza Médico Ramón Carrera, onde nos atopamos coa Casa de José Sendón, de sobria fachada presidida por un brasón, e algún outro exemplo interesante de casa tradicional. Desde aquí, por unha pequena canella, baixamos outra vez á Praza de Castelao.

A pouca distancia está o porto de Corcubión, onde se atopa o edificio do Antigo Cárcere do Partido. Para chegar alí cruzamos a estrada ata o miradoiro de Don Benigno Lago, caracterizado por un longo banco de azulexos, e camiñamos uns metros á dereita polo paseo marítimo. No porto poden verse as chalanas e botes, nasas e o resto de aparellos de pesca que utilizan os mariñeiros da vila. Aquí están situados o edificio do Club Náutico e a lonxa.

Unha vez situados no porto podemos decidir regresar de novo ao albergue ou prolongar o percorrido ata a Praia de Quenxe:
-    Para regresar ao Albergue Municipal San Roque desde o porto o máis fácil é volver á Praza de Castelao desde o porto e subir á esquerda pola Rúa Pepe Miñones ata chegar á praza do Campo do Rollo (onde está o parque infantil). Desde aquí só nos queda seguir as cunchas amarelas do Camiño de Santiago a Fisterra para regresar de novo ao albergue.
-    Se decidimos ir ata a praia de Quenxe (ida e volta desde o porto son, aproximadamente, 2km) debemos cruzar o porto e continuar polo paseo marítimo que avanza ata chegar á Praia de Quenxe, pasando polos restos do estaleiro de A Viña. Para volver ao albergue San Roque desde a Praia de Quenxe temos dúas opcións:
1)    Regresar sobre os nosos pasos ata a Praza de Castelao e subir á esquerda pola Rúa Pepe Miñones ata chegar á praza do Campo do Rollo (onde está o parque infantil). Desde aquí só nos quedaría seguir as cunchas amarelas do Camiño de Santiago a Fisterra para regresar de novo ao albergue.
2)    Unha vez que chegamos á Praia de Quenxe, se a bordeamos chegaremos a un pequeno parque infantil. Xusto antes dese parque, saímos do paseo marítimo á dereita e subimos pola Rúa Ramón Caamaño ata chegar á estrada que nos leva ata o faro do Cabo Cee (á esquerda) e á vila de Corcubión (á dereita). Esta estrada é a Rúa Río Quenxe e, neste caso, debemos tomala á dereita. Camiñamos uns metros e chegaremos á estrada AC-445, á altura do cemiterio municipal. Cruzámola e continuamos á esquerda. Uns metros máis adiante subimos á dereita pola Rúa Doutor Fleming. No seguinte cruce que atopemos subimos á esquerda por unha costa bastante empinada (Rúa Camiño do Carro) e así chegaremos ao lugar de O Vilar, onde pasaremos por unha fonte e un lavadoiro públicos situados á dereita. Continuamos de fronte ata chegar de novo á estrada AC-445. Cruzamos con moito coidado e chegaremos ao Campo de San Roque, onde se atopa o albergue municipal.